យោងតាមការស្រាវជ្រាវធ្វើឡើងដោយក្រុមហ៊ុនរបបអាហារ Forza Supplements ឱ្យដឹងថា ដើម្បីទប់ស្កាត់ការឡើងទម្ងន់ខ្លួនដែលបណ្តាលមកពីការទទួលទានអាហារក្នុងមួយថ្ងៃ៣ពេល គេចាំបាច់ត្រូវលៃពេលទទួលទាន ។ ពេលវេលាល្អបំផុតសម្រាប់ទទួលទានអាហារពេលព្រឹកគឺក្រោយម៉ោង៧បន្តិច មានន័យថា អាចម៉ោង៧និង១១នាទី ។
ចំណែកពេលវេលាសម្រាប់អាហារថ្ងៃត្រង់គឺនៅម៉ោង ១២ និង៣៨នាទី ពោលគឺចន្លោះពីម៉ោង១២និង៣០នាទីទៅម៉ោង១ ។ រីឯពេលល្អបំផុតសម្រាប់ទទួលទានអាហារពេលល្ងាចគឺចន្លោះពីម៉ោង៦ទៅម៉ោង ៦និង៣០នាទី ។
ការស្រាវជ្រាវបានបង្ហាញទៀតថា ៨៤ភាគរយនៃអ្នកជំនាញខាងរបបអាហារគិតថា ការកំណត់ពេលវេលាទទួលទានអាហារទាំង៣ពេលគឺពិតជាមានសារសំខាន់បំផុតសម្រាប់អ្នកដែលមិនចង់ឡើងទម្ងន់ខ្លួន ។
នាយកប្រតិបត្តិក្រុមហ៊ុន Forza Supplements លោក Lee Smith ថ្លែងថា៖ «រឿងសំខាន់សម្រាប់អ្នកជំនាញរបបអាហារភាគច្រើនគឺមិនមែនស្ថិតនៅលើរយៈពេលដែលពួកគេទទួលទាននោះទេ តែគឺស្ថិតនៅលើថាតើចាប់ផ្តើមនៅពេលណា ? យើងបានរកឃើញថា ពេលដែលល្អប្រសើរបំផុតសម្រាប់អាហារពេលព្រឹកគឺម៉ោង ៧និង១១នាទី អាហារថ្ងៃត្រង់ ម៉ោង ១២និង៣៨នាទី ខណៈម៉ោង ៦និង១៤នាទីជាពេលល្អបំផុតសម្រាប់ការទទួលទានអាហារពេលល្ងាច ។ ប៉ុន្តែតាមពិតទៅ គឺគ្មានអ្នកណាអាចប្រតិបត្តិតាមពេលវេលានោះដោយឥតល្អៀងបានទេ» ។
លោក Smith បានបន្តថា វិធីសាស្ត្រទប់ស្កាត់ការឡើងទម្ងន់ដ៏ជោគជ័យមួយផ្សេងទៀតគឺ មិនត្រូវគេចវេះអាហារណាមួយក្នុងចំណោមទាំង៣ពេលជាពិសេសអាហារពេលព្រឹក ។ លោកថា លទ្ធផលស្រាវជ្រាវបានបង្ហាញថា អាហារពេលព្រឹកមានសារៈសំខាន់ជាងគេក្នុងចំណោមអាហារទាំង៣ពេល ។ ការគេចវេះវានឹងរឹតតែធ្វើឱ្យអ្នកឃ្លានខ្លាំង ហើយបង្កើនការទទួលទានអាហារថ្ងៃត្រង់និងពេលល្ងាច ។
ទោះជាយ៉ាងណា គេមិនត្រូវគេចវេះមិនទទួលទានអាហារណាមួយក្នុងចំណោមទាំង៣ពេលឬទទួលទានអាហារពេលល្ងាចខកពេលយប់ជ្រៅនោះទេ ។ ការទទួលទានកៀកពេលចូលដំណេកធ្វើឱ្យកម្រិតស្ករក្នុងឈាមនិងអ័រម៉ូនអាំងស៊ុយលីនកើន ៕